Ичӧт челядь комиӧн

Быд во декабрь помын Усинскса 23 номера челядь садйын пасйӧны вужвойтыръясӧс нимӧдан лун. Неважӧн уджалысьясыс корисны волыны, видзӧдлыны, кыдзи мунӧны налӧн татшӧмсяма мероприятиеясныс.

Челядь садйын тӧдмаси зiль да авъя коми ань Ольга Волотовскаякӧд, сiйӧ старшӧй воспитатель да методист, кывукутӧ коми кыв да культура сӧвмӧдан удж вӧсна. Ань волӧма овны Усинскӧ Щеллябӧжысь, во дас вит сайын. Медводзсӧ воспитателялӧма, а сэсся босьтчӧма веськӧдлыны кабинетӧн. Челядь садйын лӧсьӧдӧма музей сяма торъя жыр, кӧнi унапӧлӧс важ кӧлуй, коми му да сылӧн история йылысь юӧртанторъяс. Сэтчӧ волывлӧны весиг школаысь велӧдчысьяс экскурсияясӧн.

Кончерт сяма мероприятиеыс вӧлi котыртӧма ыджыд югыд актӧвӧй залын. Водзвыв нин лӧсьӧдӧма важ керка пытшкӧс декорация: укват да чугуна пач, лабичьяс, джодж дӧраяс вольсалӧма да уна мукӧдтор.

Гажӧдчӧм вылас чукӧртчӧмаӧсь вӧлiны садлӧн став группаысь челядь. Найӧ сюся кывзiсны да видзӧдiсны артистъяслысь выступлениеяссӧ. А петкӧдлысьяснас вӧлiны асьныс воспитательяс, мича да авъя аньяс, да челядь. Уна рӧма коми паськӧмаӧсь. Нуӧдiс гажсӧ «Войвывса дзоридзьяс» ансамбльын сьылысь, «Коми котырнымлӧн» усинскса юкӧнӧн веськӧдлысьӧс вежысь, 23 номера детсадса воспитатель Валентина Канева.

Медводз ичӧт нывъяс петкӧдлiсны номер, кодi сиӧма Коми Республика 96 во тырӧмлы. Валентина Канева висьталiс, кыдзи олӧмаӧсь важӧн коми йӧз, мый вӧчлӧмаӧсь, кыдзи коллялӧмаӧсь кузь рытъяссӧ. Торъя нин тӧлын, выль во да Рӧштво гажӧдчан лунъясас. Аньяс петкӧдлiсны, кыдзи важӧн йӧзыс вурун нистывлӧмаӧсь, печкӧмаӧсь, кыӧмаӧсь чери кыян кулӧмъяс да с. в. Ӧти кагавидзысь весиг олысяӧ вӧлi пасьтасьӧма.

«Ой-я да», «Мӧдлапӧв» йӧктӧмторъяс (турун керӧм йылысь), «Ӧшкамӧшка» сьыланкыв, «Пышкай» нима кытшын ворсӧм бураа гажӧдыштiсны локтӧмаясӧс. Челядь артистъяскӧд ӧтлаӧн гораа мӧдпӧвъёвтлiсны (повторяйтiсны) коми сёрникузяяс, вочавидзисны юалӧмъяс вылӧ, тӧдмасисны коми шусьӧг да кывйӧзъясӧн. А мыйта рад налы вайис коми нӧдкывъяс тӧдмалӧм! Тадз ворсӧм-сьылӧм пыр кагукъяс тӧдмасисны вужвойтыр оласногӧн. Сьӧлӧлӧм вылам воис, кыдзи нёль нывка (Полина, Диана, Вероника да Кира) лыддисны вӧр-ва йылысь кывбуръяс.

А помасис гажыс воспитательясӧн «Изьва чышъян» йӧктӧмӧн. Челядь бура дыр видзӧдiсны, кутшӧм мича шальясӧн ветлалӧмаӧсь важӧн коми войтыр да кутшӧм аслыпӧлӧс сьыланкывъяс сьывлывлӧмаӧсь. Кончерт бӧрас став челядьсӧ гаж котыртысьяс гӧститӧдiсны картупеля чӧскыд шаньгаясӧн.

– Гаж кежлас дасьтысим уна лун, – висьталiс мероприятие помасьӧм бӧрын детсадйӧн веськӧдлысь Татьяна Ганиева. – Ыджыд отсӧг миянлы век сетӧ «Войвывса дзоридзьяс» котыр и торйӧн веськӧдлысьныс Людмила Гур. Со и таво найӧ вичмӧдiсны мича костюмъяс миянлы. Ставсьыс таысь налы ыджыд аттьӧ. Чужан кыв да культура йылысь занятие нуӧдам группаясас тшӧкыда, сы вӧсна мый миян уна коми воспитательыс уджалӧ. Неважӧн вермалiм Коми Республика да НАОын олысьяс пӧвстын социальнӧй проектъяс конкурсын, кодӧс быд во котыртлӧ «ЛУКОЙЛ». Вермалӧмысь вичмӧм сьӧм вылас кӧсъям лӧсьӧдны коми вӧр-ва йылысь кабинет. Чайта, тадзи ми велӧдам кагукъясӧс видзны да радейтны чужанiн. Аслад муад ӧд и вужйыд, и выныд.

Григорий Кожевин

Теги: