Туйяс, керка, Ӧтуввез...

Талунъя гижӧдын тӧдмасям, мый йылысь сёрнитiсны усинскса коми войтыр чукӧртчылӧм вылын Усвавом на Нӧвикбӧжысь делегатъяс.

Муниципальнӧй кытшлӧн медыджыд сикт олысьяс нимсянь висьтасис Ирина Мочалова том ань. Медводз сiйӧ юӧртiс, мый таво вӧчӧма усвавомсаяслысь олӧм бурмӧдӧм кузя. Медтӧчанаыс на пиысь: кыпӧдӧма да овмӧдӧма 36 жыръя керка, лӧсьӧдӧма челядьлы ыджыд ворсан площадка, восьтӧма почта улӧ выль стрӧйба, Усвавом Нӧвикбӧж костын дзоньталӧма туй, ньӧбӧма да вайӧма сиктса вичкоӧ жыннянъяс. Йӧзыс зiльӧны культура мероприятиеяс нуӧдны, отсалӧны олӧма да вермытӧмаяслы, асьныс весалӧны сикт гӧгӧрысь ёг да вӧчӧны уна мукӧдтор.

– Дерт тырмӧ на и сьӧкыдлуныс, – висьталiс Ирина Александровна. – Сиктын уна важ киссьӧм олан керкаыс. Та вӧсна колӧ кыпӧдны выль оланiн, торъя нин пӧрысьяслы, уджвыв ветеранъяслы. Сикт гӧгӧр этша нин кольӧма ягыс, медым дасьтыны пес, колӧ мунны сиктысь уна километра сайӧ. Видзны вӧр-ванымӧс отсалас сиктӧ биару труба нюжӧдӧм.

Йӧз корӧ бурджыка дзоньтавны электроэнергияӧн могмӧдан линияяс, тшӧкыда Усвавомын биыс «куслывлӧ» да. Сиктса больнича стрӧйбаын усвавомсаяс тшӧктӧны вежны шоныд сетан система: дзикӧдз нин шогмытӧм. Колӧ шуны, мый Усвавом больнича дзик ӧти муниципальнӧй кытшаным, танi куйлӧны мукӧд сикт-грездысь висьысьяс. Унаысь найӧс ковлывлӧ нуӧдны карса бурдӧдчанiнӧ, но машинаыс важ нин, тшӧкыда «жугласьӧ». Усвавомсаяс корӧны отсавны ньӧбны больничалӧн могъяс вылӧ медицинскӧй автомобиль.

Сиктын эм кык унапатераа благоустроитӧм панельнӧй керка, кодӧс кыпӧдлiсны комын во сайын нин. Олысьясыс корӧны, медым локтан воӧ управляющӧй овмӧсыс дзоньталас керкаясыслысь панель коластъяссӧ, а тшӧтш лӧсьӧдас вевтсӧ. Крыша дзоньтавны колӧ и мукӧд сиктса коммунальнӧй керка вылысь. Олӧмыс сӧвмӧ, унатор нин вӧчсьӧ Интернет отсӧгӧн. Та вӧсна усвавомсаяс корисны Ростелекомын зiльысьясӧс выльмӧдны телепон йитӧд мӧгмӧдан оборудованиесӧ, медым йӧзыс вермисны пырӧдчыны проводтӧм ӧда ӧтуввезйӧ.

Нӧвикбӧжса делегат Ольга Чупрова воӧма важ коми сарапанӧн. Дзик ӧтнас вӧлi пасьтасьӧма сiдзи, кыдзи ветлалiсны важӧн коми аньяс. Таӧн, ме думысь, петкӧдчис сылӧн чужан мусӧ радейтӧмыс, оласногнымӧс пыддипуктӧмыс. Сiйӧ тшӧтш медводз висьталiс, мый вӧчӧма грездын олӧм бурмӧдӧм, оласног сӧвмӧдӧм кузя.

– Таво грездын вӧлi сувтӧдӧма челыдьлы ворсӧм вылӧ площадка, – висьталiс Ольга Николаевна. – Местасӧ сы улӧ ми, грездса олысьяс, лӧсьӧдiм ӧтвыв (ваялiм гравий, шыльӧдiм-мольӧдiм, отсалiсны тшӧтш ас вылӧ уджалысьяс, «Усинскса ДРСУ», карса асвеськӧдланiн (администрация) да мукӧд). Миян олысьяс кутӧны лача, мый локтан во площадка вылас пуктасны спорттренажёръяс, медым сэтчӧ вермисны волыны не сӧмын челядь да налӧн бать-мам, но и том войтыр.

Грездын олысьяс делегатныс пыр тшӧктiсны медводз дзоньтавны грездпытшкӧс туй, сiйӧ «жугласьӧма», нырӧка. Кыдзи и усвавомса олысьяс нӧвиксаяс корӧны нюжӧдны грездӧ биару труба.

Нӧвикбӧж скважинаясысь босьтӧм юан ваыс гудыр, сэтчӧ колӧны фильтръяс. Грездса олысьяс корӧны сувтӧдны орчча Усвавом сиктын банкомат, сы отсӧгӧн кокньыдджык лоӧ мынтысьны коммунальнӧй могъясысь, босьтны карточкаяс вылысь сьӧм (унаӧн уджалӧны усинскса предприятиеяс вылын да сьӧмсӧ налы вуджӧдӧны буретш татшӧм картаяс вылӧ) и с. в.

Тавося чукӧртчылӧм йылысь казьтылӧм пыдди Ольга Чупрова козьналiс «Коми войтыр» усинскса юкӧнӧн, карса Сӧветӧн да администрацияӧн веськӧдлысьяслы неыджыд небӧг (книга), кодӧс таво лӧсьӧдӧмаӧсь Нӧвикбӧж культура керкаын уджалысьяс. Сэнi висьтавсьӧ «Йӧлӧга» быдвося муниципальнӧй йӧзкост гаж йылысь (сiйӧс век нуӧдлӧны Нӧвикбӧжын).

Делегатъяслӧн висьтасьӧм бӧрын чукӧртчӧмаяс вынсьӧдiсны резолюция, кӧнi петкӧдлӧма, мый медся тӧдчанасӧ колӧ вӧчны коми войтыр олӧм бурмӧдӧм могысь.

Григорий Кожевин