Усинскын абу «Войвыв кодзув»?

Лыддьысьӧй тшӧкыдджыка комиӧн, сэки и кывйыс кутас сӧвмыны-быдмыны, олӧмыд мусаджык, югыдджык лоӧ. Вайӧ ог сетӧй кми руыслы сывны-бырны.

Тӧда, кыдзи олӧмаджык коми войтыр радейтӧны лыддьысьны комиӧн. Пенсия вылад петӧм, ныв-пи быдмӧм бӧрад прӧст кадыд унджык лоӧ. Со и позьӧ лыддьысьыштны чужан кыв вылад. Помнита, кыдз кувсьылӧма нин талун кежлӧ тьӧтӧй быд тӧлысь виччысис «Войвыв кодзув» журнал, став висьт, повесьт да романъяссӧ (найӧ юкӧнъясӧн медводз петӧны вӧлi буретш «Войвыв кодзулад») лыддьылiс.

Дерт и школаясын коми литература урокъяс дырйи журналын йӧзӧдӧмторъясӧн тӧдмасьлӧны челядь. Да и коми семьяясын, сикт-грездын, карын корсюрӧ босьтлӧны журналтӧ, медым листайтыштны, лыддьыштны. Тадзи ас кывйӧн гижӧдтӧ тшӧкыдджыка лыддян кӧ, и чужан сёрни он нин вунӧд, пыддипуктанджык сiйӧс. Эмӧсь, тӧда, миян районын йӧз, кодъяс йӧзӧдчылiсны «Войвыв кодзулад». Шуам, Семӧндрейысь (Мутнӧй Материкысь) Анатолий Каневлӧн петавлiс во куим-ӧ-нёль сайын кӧр видзысь йылысь ме думысь зэв мича, интереснӧй «Перелом» повесьт. Комынӧд воясын овлӧм кӧр видзысь йылысь. Бӧрыннас сёрнитлi сыкӧд да висьталiс, мый сюрӧсыс гижӧдвслӧн – збыль олӧмысь. Лоӧ кӧ позянлун, корсьӧй библиотекаясысь да лыддьӧй. Ог нин казьтыв Прасканын чужлӧм нималана коми гижысь Егор Рочев йылысь.

А талун дженьыдика висьтала мый петiс сора (июль) тӧлысся «ВОЙВЫВ КОДЗУВ» журналлӧн выль номерын:

Елена АФАНАСЬЕВА. «Став кывйыс йитчас – мӧвпсӧ нуигсор» Кывбуръяс

Алексей ПОПОВ. Ичӧтик пьесаяс

Анжела ИЛЬИНА. Колӧ овны водзӧ. Кык шуд. Висьтъяс

Татьяна ШАХОВА. Репасасьӧ шонді вӧртас сайӧ. Кывбуръяс

Елена ГАБОВА. Москва синвалы эскӧ. Повесьт

Валентин ЧУПРОВ. Изьваса Кона Паш орд

Владимир ТИМИН. Лунысь-лунся пасйӧдъяс

Анжелика ЕЛФИМОВА. Кывбур йылысь висьт

Раиса ВАГНЕР. «Луныс тон гажаджык лоис...»

Интернетын Коми википедияысь (электроннӧй справочникысь) лыдди: журнал петӧ Сыктывкарын 1926 восянь – «Ордым», 1931 восянь – «Ударник», 1946 восянь – «Войвыв кодзув» ним улын.

Журналлӧн медшӧр редакторъясӧн вӧлiны коми гижысьяс: Николай Попов (1926–1930), Виктор Савин (Нёбдiнса Виттор) (1928), Яков Рочев (Митрук Як; 1953–1969), 1970 восянь – Серафим Попов, Пётр Шахов (Педот Петыр), Михаил Елькин (2014 вося тӧвшӧр тӧлысьӧдз). 2014 вося тӧвшӧр тӧлысьсянь журналӧн веськӧдлӧ Алексей Полугрудов (Лы Тун). Журналын йӧзӧдӧны кывбуръяс, висьтъяс, повесьтъяс, романъяс, вуджӧдӧмъяс, литература да Коми му олӧмысь пасйӧдъяс, чолӧмалӧмъяс.

Ставыс эськӧ бур, но вывтi гажтӧм юӧр кылi карса библиотекаын уджалысьсянь. Ни ӧти Усинкса небӧг видзанiнӧ «Войвыв кодзув» оз лок. Важ номеръясыс эм, а выльыс, шуам, тавосяыс абу нин. Ог и тӧд, кыдзи сиктса коми лыддьысьысь журналсӧ аддзас. Ме тай карын эг вермы на. Дерт, эськӧ бӧрыннас аддза жӧ, корла кӧ почта пыр судзӧдысьяс дорӧ. Но мыйла нӧ коми сиктъясас библиотекарьясыс абу гижӧдчӧмаӧсь «Войвыв кодзув» вылад? Висьталӧны, мый коланлуныс сыын йӧзыслӧн абу. А ог ӧмӧй тайӧ коланлунсӧ ми асьным артмӧдӧй. Сiйӧ жӧ библиотекарыд кӧ школаын внекласснӧй урок коми журнал кузяыд эськӧ нуӧдiс кӧ, либӧ зiльджык лыддьысьысьяссӧ чукӧртлiс да ышӧдiс тӧдмасьны журналнад. Абу-ӧ яндзим аслыным, комияслы, мый ог судзӧдӧй, ог лыддьӧй «Войвыв кодзувлысь» выль петасъяссӧ?

Мукӧд коми периодикаысь «Коми му» газет локтӧ сӧмын карса шӧр библиотекаӧ, «Би кинь» челядьлы да «Чушканзi» серамбана журналъяс – став сиктса да челядь карса небӧг видзанiнъясӧ, а «Йӧлӧга» том коми войтырлы журнал – ӧткымын сиктса да челядь карса билиотекаӧ. Со тадзи небӧг видзанiнъяс бӧръя коми журнал-газетнад «озырмӧны». А гашкӧ мӧдарӧ – гӧльмӧны?