Мустӧм сёрни

Быд вежон звӧнитчыла сикт-грездъясӧ, медым тӧдмавны выльторъяс йылысь. Шыӧдчыла медсясӧ сиктса администрацияясӧн веськӧдлысь да уджылысьяс дорӧ, медым эз вӧв весь сёрниа юӧрӧн (слухӧн) выльторйыс. Сэсся нин чукӧртӧм информациясӧ йӧзӧдам газетын.

Колян выльлунӧ (понедельникӧ) бара звӧнитчалi, юасялi. Йитчылi и Денисовка администрацияын уджалыськӧд. Но кыдзкӧ-мыйкӧ сёрниыс эз артмы. Мыйла? Висьталышта, юксьышта мӧвпъяснам та йылысь талунъя гижӧдторъям.

Сёрни ёртӧй веськыда шуис, мый «Усинскса выль юӧрным» грездӧ локтӧ сёрмӧмӧн да и лыддьынысӧ пӧ нинӧм сэтысь: кос юӧр да куш статистика. Но эг ло сӧглас тайӧ шуӧмнас. Дерт, лыддьысьысь тӧдӧ, мый ми выль восянь сьӧм абутӧм вӧсна газетнымӧс разӧдам асьным, ог почта пыр, кыдзи важӧн. Медым ас кадӧ вайны сiйӧс ылi грездӧ, колӧ кад. Быд выльлунӧ газетнымӧс (сiйӧ ӧнi петӧ ӧтчыдысь вежоннас вӧскресенньӧясын) ми ыстам «Николай Горный» теплоходӧн, а сэтысянь нин сiйӧс вайӧны подписчикъяслы сиктса олысьяс асьныс. Мыйла сёрмӧ кутшӧмкӧ номер, колӧ видлавны торйӧн. Но менӧ шемӧсӧ вайӧдiс ёртӧйлӧн висьталанногыс: тi нинӧм коланасӧ он гижӧй, сёрмӧмӧн газетсӧ ваянныд, поланныд висьтавны грездлӧн сьӧкыдлунъяс йылысь да с. в.

Вайӧ мӧвпалыштам, збыль-ӧ тадз. «Усинскса выль юӧрным» петӧ 1975-ӧд восянь. Кутшӧм эськӧ сьӧкыд эз вӧв, тайӧ кузь кадколастнас петавлiс и петӧ быд номер. Ми зiлям юӧртны танi став медшӧр карса да сиктса лоӧмтор йылысь. Дерт, газет лӧсьӧдысьяс (учредительяс) пиысь ӧтиӧн лоӧ карса администрация. Та вӧсна ми ёнджыкасӧ мыджсям официальнӧй юӧръяс сетӧм вылӧ, ог корсьӧй, кыдзи мукӧд изданиеяс, чуймӧданторъяс (сенсацияяс). Тшӧтш и сьӧкыдлунъяс, проблемаяс зiлям видлавны быд боксянь и ӧттшӧтш юӧртам, петкӧдлам туйяс, кыдзи эськӧ найӧс разьны, бырӧдны. Таын ми ёнджыкасӧ мыджсям власьт бердын зiльысьяслӧн видзӧдлас да уджтас вылӧ.

Гӧгӧрвоана, мый быд сиктын уна нелючкиторйыс. Тшӧтш найӧ тырмӧмӧн и Денисовкаын (Миняын). Висьтавны, мый ми на йылысь ог гижӧй, ме думысь, оз жӧ позь. Век кор кыптылӧ сикт йылысь сёрни, найӧ петкӧдчӧны. Торъя нин на йылысь быд во ми гаралам «Коми котыр» усинскса представительство конференцияяс дырйи, кытчӧ тшӧтш локтӧны да кывзӧны сиктса йӧзсӧ и власьт бердын уджалысьяс, муниципальнӧй кытш сӧветысь депутатъяс, республика министерствоясын зiльысьяс. Босьтӧны тӧд вылӧ юӧртӧмторъяссӧ, корсьӧны сьӧкыдлунъяс бырӧдан туйяс. И ставсӧ та йылысь ми гижам газетын.

Шуам, 2009-ӧд воын Динисовкаын сотчис Культура керка. Стрӧйбаыс вӧлi важ нин, электропроводъясыслӧн изоляцияыс шогмытӧм, со и лои неминучаыс... Власьт бердын уджалысьяс сiйӧ жӧ вонас шуисны, кутам кыпӧдны выльӧс, корсям сьӧм. Но шунысӧ кокни, а вӧчнысӧ... Сьӧм эз тырмы, со и ӧнӧдз Денисовка клубтӧм. Кончертъяссӧ грездсаяс нуӧдӧны либӧ ывла вылын (торъя пос лӧсьӧдӧмаӧсь да), либӧ школалӧн физзалын. Шог, дерт. Но та йылысь ми век гижим и кутам гижны. Йӧзӧдам и чиновникъяслысь кӧсйысьӧмъясныссӧ. Шуам, медбӧрыс юргис культура да национальнӧй политика карса управление веськӧдлысь Оксана Филипповалӧн веськыд линия вылын. Ӧнi эм кӧсйӧм выльмӧдны проектсӧ, кодӧс дасьтӧма вӧлi воддза воясас на, да локтан воын заводитны кыпӧдны Культура керкасӧ. И та йылысь ми тшӧтш гижим, тайӧ жӧ номерын. Колӧ сӧмын сюсьджыка лыддьыны газетсӧ.

Вайӧ, коми войтыр, ӧтвылысь кутам уджавны. Оз ков кодӧскӧ мыждыны, кор мыйкӧ оз артмы. Сиктса администрацияясын уджалысьяслы, ме думысь, колӧ зiльджыкӧн лоны и. Унджыкыс ас кианым, некод ӧд бокысь локтӧм морт оз миян пыдди бурмӧд олӧмнымӧс. Сӧмын отсалас, аддзас кӧ ыштӧм (заинтересованность). Вайӧ, кутам кывны ёрта-ёртӧс, сэки и татшӧмсяма мустӧм, пинясян сора сёрниыс лоӧ шочджык.

Подготовил Григорий Кожевин